သူတို့အတွေး သူတို့အမြင် (Interview အပိုင်း-၁) လွမ်းဆွတ်ခြင်း

အစီအစဉ် အသစ်လေး တစ်ခုနဲ့ မိတ်ဆက် ပေးပါရစေ။ "သူတို့ အတွေး သူတို့ အမြင်" ဆိုတဲ့ အင်တာဗျူး အစီအစဉ်လေး တစ်ခုပါ။ ဒီအစီအစဉ်မှာ ဒီလောကကြီးမှာ ဖြစ်ပျက်နေတဲ့ အကြောင်းတွေ တော်တော် များများကို လူတွေ ဘယ်လို တွေးလဲ၊ လူတွေ ဘယ်လိုမြင်လဲ ဆိုတာကို စာဖတ်သူတွေ အားလုံးနဲ့ ပြန်ပြီး မျှဝေပါမယ်။ အဓိက Target ရယ်လို့ သတ်မှတ် ထားတာမျိုး မရှိပါဘူး။ ဒီလိုပဲ Randomly Targets တွေကို မေးမြန်း သွားမှာပါ။ အခု သူတို့အတွေး သူတို့အမြင် (Interview အပိုင်း - ၁) ကိုတော့ "လွမ်းဆွတ်ခြင်း" ကို အခြေခံပြီး မေးခဲ့ပါတယ်။

သူတို့အတွေး သူတို့အမြင် (Interview အပိုင်း - ၁) တွင် ပါဝင်သူများ

• လွမ်းတာကို ထိန်းပါ ဆိုတဲ့ အိတာ
• အရင်ရည်းစားဟောင်း ကိုလွမ်းတဲ့ ဖြူလေး
• မလွမ်းတတ်ပါဘူးဆိုတဲ့ မောင်အာကာ
• အချိန်က ကုစားမှာပါ ဆိုတဲ့ ကိုစည်သူ

မှတ်ချက် ။ ။ ဒီအပိုင်း(၁) မှာ ပါဝင်ခဲ့တဲ့လူတွေကို အင်တာဗျူးလုပ်နေတာကို အသိမပေးခဲ့ပဲ သဘာဝ ဆန်အောင် မေးမြန်းခဲ့သည်။ နောက်မှာ အင်တာဗျူးလုပ်နေကြောင်း ပြောပြပြီး ခွင့်တောင်း လိုက်သည်။

x x x x x x x x x x x x x x x x x

ပထမဦးဆုံး အိမ်က အိတာနဲ့ အရင်ဆုံး စပြီး လွမ်းဆွတ်ခြင်း အကြောင်း တီးခေါက် ကြည့်ပါတယ်။

Tea: အိတာ - လွမ်းဆွတ်ခြင်းကို ဘယ်လိုထင်လဲ?
အိတာ: ထင်တာပြောမယ်နော်၊ လွမ်းတော့ လွမ်းပေါ့၊ ဒါပေမယ့် အဲ့ဒီအတွက်နဲ့တော့ အချိန် မကုန်စေနဲ့ပေါ့။

Tea: ဒါပေမယ့် အိတာရယ်၊ လွမ်းနေတာကို ထိန်းချုပ်လို့မှ မရတာ၊ မဟုတ်ဘူးလား?
အိတာ: လူ့ ဘ၀မှာ ဒီထက်အရေးကြီးတာတွေရှိတယ်လေ။ လူတစ်ယောက်ဟာ စိတ်ခံစားချက်ကို ဦးစားပေးသူဟာ လူညံ့တဲ့။ ထိမ်းရခက်တယ် ဆိုတာ ဟုတ်ပေမယ့် ထိန်းရပါတယ်။ ဦးနှောက်မပါရင် လူတစ်ယောက်ဟာ ခွေးတစ်ကောင်နဲ့ မခြားဘူးလေ။

Tea: လွမ်းတာကို တားမရတဲ့ အချိန်တွေ ကျရင်ရော ဘယ်လိုလုပ်သင့်တယ် ထင်လဲ?
အိတာ: နားလည်ပါတယ်။ လွမ်းတော့ လွမ်းပေါ့။ အချိန်တော့ မကုန်စေနဲ့လေ။ အရေးကြီးတာတွေကို မထိခိုက်စေနဲ့ပေါ့။ လူတစ်ယောက်ကို လွမ်းရင် သူ့ကို မေတ္တာပို့ပါ။ ပြီးတော့ ဒိုင်ယာရီရေးပါ။ အချိန်တန်ရင် မေ့မသွားရင်တောင် သက်သာသွားပါတယ်။

Tea: ချစ်သူနှစ်ဦး .. တစ်ဦးနှင့်တစ်ဦး .. မိုင်တွေ ထောင်ချီပြီးဝေးနေရတယ်။ တစ်ဦးနဲ့ တစ်ဦး မတွေ့ရဘူး.. လွမ်းနေတယ်။ ဒါဆိုရင်ရော ဘယ်မေ့နိုင်ပါ့မလဲနော်?
အိတာ: ချစ်သူဆိုမှတော့ ဘယ်မေ့နိုင်မလဲ၊ ဒါပေမယ့် ဖုန်းပြောပေးပေါ့၊ နောက်ဆုံး ဆိုးရွားနေရင်တော့ အချစ်အတွက်နဲ့ ကိုယ့်ဘ၀ကို စွန့်လွှတ်နိုင်လား၊ ဒါပဲမေးချင်တယ်၊ ပြီးတော့ ပြန်မတွေ့ရမှာမှ မဟုတ်တာ၊ နောက်ကျရင် တွေ့ရမှာပဲလေ၊ လွမ်းတယ်ဆိုလည်း လွမ်းလိုက်ပေါ့၊၊ အလွန်အကျွံမဖြစ်အောင်တော့ ထိန်းပေးပေါ့လေ။

x x x x x x x x x x x x x x x x x

အိတာပြီးတော့ နောက်တစ်ယောက် ဖြူလေး ဆိုသူနဲ့ ဆက်လက်ပြီး ပြောဖြစ်ပါတယ်။

Tea: လူတစ်ယောက်ကို လွမ်းတယ် ဆိုတာကို ဘယ်လိုထင်လဲ?
ဖြူလေး : လွမ်းတယ်ဆိုတာ ခံစားချက်တစ်ခုပါ။

Tea: ဘ၀မှာ လူတစ်ယောက်ယောက်ကို လွမ်းခဲ့ဖူးလား?
ဖြူလေး : လွမ်းခဲ့ဖူးပါတယ်၊ အခုလည်း လွမ်းနေပါတယ်။ တစ်ယောက်တင် မဟုတ်ပါဘူး၊ လွမ်းတဲ့ လူတွေ အများကြီး ရှိပါတယ်။ အဖေ၊ အမေ၊ သူငယ်ချင်း အစရှိသဖြင့်ပေါ့၊ အရင်ရည်းစားဟောင်း ကို လွမ်းပါတယ်၊ တစ်ယောက်နဲ့ တစ်ယောက်ကို တော့ လွမ်းပုံခြင်း မတူပါဘူး။

Tea: အရင်ရည်းစားကို ဘယ်လောက် ကြာကြာ တစ်ခါလွမ်းလဲ?
ဖြူလေး : အသေအချာတော့ မသိပါဘူး။ စိတ်ပေါ် မူတည်ပါတယ်။ သူကြိုက်တတ်တဲ့ ပစ္စည်းလေးတွေ မြင်လိုက်မိတိုင်း သတိရတယ်။ အရင်က တူတူနေခဲ့တဲ့ အချိန်တွေကို လွမ်းတယ်။ ဓာတ်ပုံတွေကိုတောင် ပြန် မကြည့်ချင်လောက် အောင် ဖြစ်ပါတယ်။ အဲ့လို အချိန်ကျရင် သူလည်း ငါမရှိပဲနဲ့ ပျော်နေမှာပဲ ဆိုတာကို တွေးကြည့်ပြီး မေ့ဖို့ ကြိုးစားပါတယ်။

Tea: အရမ်းလွမ်းနေလို့ အခြေအနေဆိုးတဲ့အခါကျရင် ဘာတွေ ဖြစ်သလဲ? ဘ၀ကို ထိခိုက်မှုတွေ ရှိသလား?
ဖြူလေး : တစ်ခါတစ်လေ ထိခိုက်ပါတယ်။ စာကျက်နေတုန်း သူ့ကို ရုတ်တရက်ကြီး လွမ်းလာရင် စာမလုပ်ချင်တော့ပါဘူး။ ဒါပေမယ့်လည်း ငါလည်း ဒီအချစ်ကို ငါ့ဘက်က အတတ်နိုင်ဆုံး ကြာရှည်ခံဖို့ ကြိုးစားခဲ့တာပဲ၊ ငါလည်း ဒါကို ဘာမှ လုပ်နိုင်မှာလည်း မဟုတ်ပါဘူး လို့ စဉ်းစားပြီး ငါ့စိတ်ထဲက သူ့ကို ထုတ်ပစ်ဖို့ ကြိုးစားပါတယ်။

Tea: လွမ်းဆွတ်ခြင်းကို ဖျောက်ဖျက်ဖို့ နည်းလမ်းတွေ ရှိပါသလား?
ဖြူလေး : လူဆိုတာကို စိတ်က ခံစားသလို ခံစားနေကြတာပါ။ အတင်းကြီး ဖိအားပေးလို့လဲ မရပါဘူး။ ဖိအားလဲ မပေးပါနဲ့။ သဘာဝအတိုင်းပဲ ကောင်းပါတယ်။ ဒါက အကောင်းဆုံး နည်းလမ်းလို့ ထင်ပါတယ်။

x x x x x x x x x x x x x x x x x

နောက်ပြောဖြစ်တဲ့ တစ်ယောက်ကတော့ ကျွန်တော်က သံမဏိလူသားလို့ သတ်မှတ်လိုက်ပါတယ်။

Tea: လူတစ်ယောက်ကို လွမ်းဖူးလား? လွမ်း၇င် ဘယ်လိုလုပ်ရမလဲ?
မောင်အာကာ: မလွမ်းဖူးပါဘူး။ ကျွန်တော့်အသက် ၁၈နှစ်ရှိပြီ၊ အခုထိ ဘယ်သူ့ကိုမှ မလွမ်းဖူးသေးပါဘူး။ မောင်နှမ၊ မိဘ၊ သူငယ်ချင်း၊ ချစ်သူကောင်မလေး၊ ဘယ်သူ့ကိုမှ မလွမ်းဖူးပါဘူး။ မိန်းကလေးတွေကိုလည်း မယုံကြည်ဘူး။ ဘယ်မိန်းကလေးကိုမှ အယုံအကြည်မရှိပါဘူး။

Tea: အကယ်လို့ အနာဂတ်မှာ လွမ်းလာရင် ဘယ်လို ရင်ဆိုင်မလဲ?
မောင်အာကာ: အဲ့ဒီအချိန်ကျရင်တော့ မီးစင်ကြည့်က ရမှာပဲလေ။

Tea: နောက်ထပ် အလွမ်းနဲ့ ပတ်သက်ပြီး ဘာများ ပြောချင်သေးလဲ?
မောင်အာကာ: ထူးထူးဆန်းဆန်းတော့ မရှိပါဘူး။ ကမ်းခြေတို့ တောင်ပေါ်တို့ ရောက်ရင်တော့ တစ်နေရာရာကို ငေးပြီး ဆွေးနေတတ်တယ်၊ အဲ့လိုအရသာကို လည်း ကြိုက်တယ်။ ဘာမှတော့ မဟုတ်ဘူး။ ဘယ်သူ့ကိုလွမ်းမှန်း မသိ၊ ဘာကို ဆွေးမှန်း မသိပဲနဲ့ကို ဖြစ်နေတာပါပဲ။ လွမ်းတယ် ဆိုပြီးတော့ သီးခြားကြီး လွမ်းတာတော့ မရှိဖူးပါဘူး။

x x x x x x x x x x x x x x x x x

ပြီးတော့ အဖေ့ကို လွမ်းနေတဲ့ ကိုစည်သူ နဲ့လည်း စကားပြောဖြစ်ပါတယ်။

Tea: ကိုစည်သူက အဖေ့ကို ဘာလို့သတိရတာလဲ?
စည်သူ: တစ်ခါတစ်လေ ပင်ပန်းလွန်းတော့ အဖေ့ကို သတိရပါတယ်။ အဖေဆုံးတာ ခြောက်လ ပြည့်တော့မယ်။ အဖေက ကင်ဆာနဲ့ ဆုံးသွားတာလေ။ မဆုံးက တစ်နှစ်လုံးလုံး တစ်အိမ်ထဲမှာ အတူ ရှိနေခဲ့တာပါ။ အဖေ မဆုံးခင်ကထဲက သူ့အတွက် စိတ်ပင်ပန်းရတယ်လေ။

Tea: စိတ်မကောင်းပါဘူး ကိုစည်သူ၊ ဒါဆိုရင် အမေကိုတော့ ပိုဆိုးမှာပေါ့နော်။
စည်သူ: ကျွန်တော့်အမေကတော့ စိတ်အရမ်းမာပါတယ်။ အဖေဆုံးသွားတုန်းကတောင် မငိုခဲ့ပါဘူး။ အဖေ အသက်ရှိစဉ်တုန်းကလည်း အဖေ့ရောဂါက ကင်ဆာဖြစ်သွားတာ၊ နှားခေါင်းအနောက်မှာ ဖြစ်တာပါ။ သူက ဦးနှောက်ကို သွားဖိပြီး အာရုံကြောတွေကို ဖိပစ်တာ အောက်ပိုင်းတစ်ခုလုံး ဘာမှ မသိတော့ဘူးလေ။ အမေလည်း ဆေးကုစရိတ်တွေက ဈေးအရမ်းကြီးတော့ ပိုက်ဆံရှာရတာ အ၇မ်းပင်ပန်း ခဲ့ပါတယ်။ သူလည်း အတတ်နိုင်ဆုံး လုပ်ပေးခဲ့တာပဲ ဆိုပြီး စိတ်ကို ဖြေလိုက်တယ်လေ။

Tea: ကိုစည်သူက အဖေ့ကို အမြဲလိုလိုလွမ်းလား? ဘယ်လိုအချိန်မှာ လွမ်းတတ်သလဲ?
စည်သူ: တိုက်ဆိုင်မှပါ အလုပ်လုပ်နေရတော့ အချိန်တိုင်း သတိရတယ်လို့တော့ မရှိပါဘူး။ ဥပမာ သူ ကြိုက်တဲ့အစားအစာတို့ ကြိုက်တတ်တဲ့ဟာတွေကို တွေ့ရင်တော့ ပိုသတိရတယ်။

Tea: အမေကရော အလွမ်းကို ဘယ်လို ဖြေသိမ့်ပါသလဲ?
စည်သူ: အမေကတော့ တရားနာနေတာ များပါတယ်။ အိမ်အလုပ်တွေလည်း ပိုလုပ်နေတတ်တယ်။ အချိန်ကြာလာတော့ အချိန်ရဲ့ ကုစားမှုနဲ့ ပုံမှန်ပြန် ဖြစ်လာမှာပါ။ သေတဲ့ လူက ပြန်ရှင်လာမှာမှ မဟုတ်ပဲလေ။ မသေခင် သူ့ကို အကောင်းဆုံး လုပ်ပေးနိုင်ဖို့သာ အဓိကပါ။

x x x x x x x x x x x x x x x x x

ကဲ.. သူတို့အတွေး သူတို့ အမြင် (Interview အပိုင်း-၁) လွမ်းဆွတ်ခြင်း ကို ဒီတင်ပဲ ရပ်နားလိုက်တာပေါ့။ ဒီလောက် ဆိုရင် စာဖတ်သူတွေ အားလုံးလည်း စိတ်ထဲမှာ လွမ်းတယ် ဆိုတာ ဘာလဲဆိုတာ ရှိလောက် ရောပေါ့။ ဘယ်လို ပြင်ဆင်ထားရမယ် ဆိုတာလည်း ရှိထား သင့်ပါတယ်။ စာဖတ်သူတွေရဲ့ အတွေးတွေ အမြင်တွေကိုလည်း ကောမန့်ထဲမှာ မျှဝေ နိုင်ပါတယ်။

လွမ်းတယ်ဆိုတာ တကယ်တော့ အချစ်ရဲ့ အပိုင်း သေးသေးလေး တစ်ခုပါ။ အချစ်လိုပဲ နာကျည်း ရတတ်ပါတယ်။ အချိန်ရဲ့ ကုစားမှုကြောင့် လူတွေ သက်သာ သွားပေမယ့် ထာဝရ မသက်သာတဲ့ လူတွေလည်း အများကြီး ရှိပါတယ်။

Tea